2 красавіка суд Ленінскага раёну разгледзіў справу апошняга з затрыманых напярэдадні 25 сакавіка, моладзевага актывіста Яўгена Суворава, які двое сутак правёў у ізалятары часовага ўтрыманьня.
Год таму, падчас сакавіцкіх падзеяў у Менску, Я. Суворава адправілі ў Магілёўскі сьледчы ізалятар, дзе правёў больш за месяц па надуманым абвінавачваньні ва ўхіленьні ад службы ў войску. На той момант спэцслужбы лічылі, што хлопец зьяўляецца каардынатарам руху ЗУБР дый рыхтуе людзей да паездкі ў Менск. Інфармацыя пра грамадзкую актыўнасьць моладзевага лідэра агучаная і гэтым разам. Я. Сувораў не хаваў палітычнай матывацыі справы.
Тым не менш, хлопца абвінавацілі ў парушэньні артыкула 17.1 Адміністрацыйнага кодэксу — дробнае хуліганства. Міліцыянты сьцвярджалі, што Сувораў у нецьвярозым стане «крычаў, размахваў рукамі і мацерна лаяўся».
Цікава, што ў судзе не пацьвердзілася і палова з таго, што было ў рапартах. Так, даказана, што Сувораў быў цьвярозы, а што ён выкрыкваў, ніводны са сьведкаў ня мог патлумачыць. Таму прысуд выклікаў цэлую хвалю сьмеху ў судовай залі: пасьля 40‑хвіліннага перапынку судзьдзя Тацяна Рубіс абвесьціла пра 7 сутак арышту.
Суд стаўся дакладнай копіяй таго, што прысутныя пабачылі літаральна трыма гадзінамі раней. Дакладна такі ж самі прысуд пры такіх жа самых абставінах атрымаў яшчэ адзін моладзевы актывіст Антон Усьцімчук. Магілёўскія праваабаронцы зноўку загаварылі пра «палітычны канвэер».
Цяпер чытаюць
Яўген Афнагель расказаў, што было пасля суда, дзе скандавалі «Верым, можам, пераможам!» І назваў, хто для яго сапраўдны лідар Беларусі1
Каментары