Міністэрства замежных спраў РФ памылкова адправіла рэкамендацыю не даваць інтэрв'ю японскай газеце «Санкэй» у рэдакцыю самой газеты.
Згодна з адкрытым лістом у адрас афіцыйнага прадстаўніка МЗС Расіі Марыі Захаравай, апублікаваным на сайце газеты «Санкэй», дадзеная рэкамендацыя, відаць, прызначалася аднаму з расійскіх ведамстваў, цытуе паведамленне рэдакцыі журналіст Аляксей Кавалёў.
«Газета «Санкэй» сярод асноўных друкаваных выданняў Японіі займае асабліва крайнюю пазіцыю, з'яўляючыся нацыяналістычна накіраванай. У многіх артыкулах пра Расію ўтрымліваецца крытыка, часам нападкі, неаднаразовае скажэнне рэальнасці, перадаецца негатыўны пункт гледжання. Абапіраючыся на антырасійскі стыль падачы апошняга часу, мы рэкамендуем не даваць інтэрв'ю гэтаму выданню», — цытуе рэдакцыя газеты электронны ліст МЗС РФ, які патрапіў у рэдакцыю гэтай самай «нацыяналістычна накіраванай» газеты.
Рэдактар гэтай газеты, у сваю чаргу, выказаўшы нязгоду з пунктам гледжання МЗС РФ, канстатаваў: «Міністэрства замежных спраў, якое курыруе знешнія сувязі Расіі, вялікай краіны, дапускае такія элементарныя памылкі, як адпраўка афіцыйнага ліста не таму адрасату. Застаецца толькі зрабіць выснову, што апошнім часам дзяржаўныя ўстановы Расіі з такой стараннасцю да самазабыцця ідуць за Яго Правасхадзіцельства Прэзідэнтам, што страцілі хватку ў сапраўдных справах».
Прадстаўнік МЗС РФ Марыя Захарава паспрабавала растлумачыць канфуз, абвінаваціўшы японскую газету ў прысваенні «чужога ліста»:
«Да нас рэгулярна звяртаюцца альбо журналісты, альбо грамадскія арганізацыі з просьбай выказаць меркаванне пра якія-небудзь замежныя СМІ, якія акрэдытаваныя ў Маскве… Да нас каля месяца таму быў зварот адносна магчымасці супрацоўніцтва з газетай «Санкэй сімбун». Мы прааналізавалі матэрыялы гэтай газеты за апошнія некалькі месяцаў і далі сваё заключэнне, якое фармулявалася такім чынам: паколькі большасць матэрыялаў мае адкрыта ангажаваны і крытычны характар (у кантэксце скажэння фактаў), а часам нават агрэсіўныя матэрыялы ў іх публікуюцца, то мы лічым немэтазгодным узаемадзеянне з гэтай газетай», — цытуе Захараву Дождь.
Паводле яе слоў, гэты «ліст не належаў газеце, гэта не ліст, які прызначаўся ім. Гэта чужое пісьмо. Яны палічылі магчымым сабе прысвоіць яго…»
Прадстаўнік МЗС РФ таксама лічыць, што, «газета, калі давяла да агульнага ведама гэты ліст, здзейсніла антыпіяр у адносінах да сябе».
Цяпер чытаюць
Фоты з Масквы даюць пабачыць Пуціна і Лукашэнку без грыму8
Каментары