Сведкі гатовыя заступіцца за падпалкоўніка Казлова ў судзе
Суд можа пачацца на наступным тыдні.
Былы падпалкоўнік міліцыі Мікалай Казлоў знайшоў сведак свайго затрымання вечарам 19 снежня мінулага года.
Людзі адгукнуліся на яго зварот праз незалежныя СМІ.
Яны гатовыя ў судзе пацвердзіць абгрунтаванасць прэтэнзій Казлова як да супрацоўнікаў у цывільным, якія яго затрымлівалі, так і да рашэння суда наконт арышту падпалкоўніка на 5 сутак.
«Яны патэлефанавалі, назвалі сябе. Чакаю зараз рэакцыі суда — яны мусяць паведаміць, калі будзе судовае паседжанне. Тое самае і наконт скаргаў у пракуратуру: яны пададзеныя на тых супрацоўнікаў, якія сфальсіфікавалі ўсё — ад першага да апошняга слова ў сваіх рапартах. Таксама чакаю рэакцыі, але пакуль няма ніякай».
Нагадаем, Мікалая Казлова затрымалі 19 снежня ў Мінску на пераходзе ля ўніверсама «Цэнтральны». Але ў міліцэйскім рапарце адзначана, што яго затрымалі ля Чырвонага касцёла за тое, што ён, нібыта, брудна лаяўся на адрас журналістаў і ўдзельнікаў несанкцыяванай акцыі.
За гэта падпалкоўніка міліцыі асудзілі на 5 сутак арышту.
Пасля адбыцця пакарання Казлоў напісаў скаргу ў пракуратуру на дзеянні супрацоўнікаў у цывільным і заяву ў суд. Падпалкоўнік не верыць, што пакараюць супрацоўнікаў праваахоўных органаў, якія, па яго словах, сфальсіфікавалі пратакол яго затрымання, ні ў перагляд рашэння суда. Але, кажа Казлоў, і ў суддзі, і супрацоўнікаў пракуратуры мусіць быць выбар.
Верагодна, кажа Казлоў, суд можа адбыцца ўжо на наступным тыдні.
***
Мікалай Казлоў — падпалкоўнік міліцыі ў адстаўцы, які ў 2008 г. пасля парламенцкіх выбараў расказаў пра механізм фальсіфікацыі галасоў на выбарчым участку, які ён мусіў ахоўваць падчас датэрміновага галасавання.
Факт фальсіфікацыі ўлады расследавалі фармальна, а вось на прынцыповага міліцыянера пачалі сапраўдны ціск, пасля чаго Казлоў з міліцыі звольніўся. У 2010 годзе Мікалай Казлоў браў удзел ў акцыях маўчання на Кастрычніцкай плошчы і цудам пазбег затрымання.
Колькі сёлета трацілі на вяселлі ў Беларусі? Сабралі рэальныя лічбы тых, хто пабываў у ЗАГСе6
Каментары