Браты Грым вандруюць па Нямеччыне, ратуючы даверлівых жыхароў ад нячыстай сілы, якую самі ж і ствараюць. Акупацыйныя францускія ўлады адпраўляюць махляроў у Марбурскі лес, дзе зьнікаюць дзеці. Там авантурнікаў чакаюць жывыя дрэвы, ваўкалак і ведзьма, якой 500 гадоў.
Тэры Гіліям, вядомы па абсурдысцкай «Бразыліі», расквеціў 100-мільённы бамба-фільм гратэскнымі прымочкамі. Брунатна-галюцынацыйны лес (гібрыд «Соннай лагчыны» й «Марозка»), Чырвоная Шапачка, злая жыжа з вачыма, разбэшчаная пяшчотамі Жаба.
Вільгельм Грым (Мэт Дэйман) — практычны й рацыянальны; узыходная галівудзкая зорка Гіт Леджэр грае яго рамантычнага брата Якаба. Пакуты пяцісотгадовай каралевы, якая не жадае старэць, разыграла Моніка Бэлючы.
Але самы гіліямаўскі пэрсанаж, вяршыня гратэску — генэрал Дэлятомб, які ня любіць казак і харчуецца пашкамутанымі кацяняткамі. Сьмерць генэрала, які загадаў паліць забабонна-партызанскі лес, выклікае радасны ўздых у залі. «Я толькі хацеў, каб быў парадак», — сьцьвярджае адмоўны герой. Але цынічны Т.Гіліям усталёўвае свой парадак, дзе ўлада касуецца, а рамантычныя казкі атручаныя ангельскай іроніяй.
Ня кожны глядач дажыве да канца сэансу. Для дарослых фільм занадта казачны, для дзяцей — занадта страшны.
▶
«Браты Грым» («The Brothers Grimm»)
ЗША—Чэхія, 2005, каляровы, 118 хв.
Жанр: страшная казка.
Адзнака: 7,5 (з 10).
Цяпер чытаюць
У Мінску ўсё ж назвалі прыпынкі ў гонар «паляка-рэваншыста» і «русафоба», супраць якіх марна ваявала Бондарава8
Каментары