Аўстрыйскі Telekom пацьвердзіў, што вядзе перамовы з беларускім бокам.
Адна зь вядучых эўрапейскіх тэлекамунікацыйных карпарацый Telekom Austria Group AG пацьвердзіла, што вядзе перамовы наконт магчымага набыцьця беларускага прадпрыемства сотавай сувязі.
Гэта заява была зроблена пасьля таго, як днямі ў аўстрыйскіх СМІ зьявілася інфармацыя пра шматмільярдную ўгоду доччынай фірмы аўстрыйскага Telekom ‑‑ Mobilkom Austria на беларускім рынку. Імя беларускага сотавага апэратара па‑ранейшаму афіцыйна не агучваецца, аднак аўстрыйскія экспэрты і аглядальнікі называюць ў якасьці адзінага верагоднага кандыдата кампанію Velcom.
Калі зьдзелка адбудзецца, то аўстрыйскі інвэстар стане ўладальнікам другога па ліку беларускага дзяржаўнага прадпрыемства. Месяц таму акцыі беларускага заводу «Матавэла» набыў аўстрыйскі холдынг «ATEC».
Паводле інфармацыйнага агенцтва АРА, для Mobilkom гэта можа быць самая дарагая пакупка за ўсю гісторыю фірмы ‑‑ болей як 1,6 мільярды эўра. Як падаюць аўстрыйскія журналісты, дэталі зьдзелкі, хутчэй за ўсё, будуць агучаныя 2 кастрычніка, у часе паседжаньня назіральнай рады аўстрыйскага Telekom.
***
Mobilkom Austria лічыцца эўрапейскім піянэрам мабільнай сувязі 3‑га пакаленьня ‑‑ 3G. У якасьці паслугаў кампаніі ‑‑ самыя розныя відэаперадачы, уключна з праглядам «жывога тэлебачаньня», фрагментаў футбольных сустрэчаў, рознай мультымэдыйнай інфармацыі.
Сярод апошніх яркіх зьдзелак фірмы — набыцьцё ў 2005 годзе 100% акцыяў вядучага баўгарскага сотавага апэратара «MobilTel. Тады ж кіраўніцтва аўстрыйскай кампаніі зрабіла заяву і пра сваю цікавасьць да беларускага рынку: «Мы думаем таксама і пра Беларусь, Румынію, Расею і Ўкраіну».
Цяпер чытаюць
Міліцыя схавала галоўнае — магілёўскі маньяк-ліфцёр ужо сядзеў за згвалтаванне. Але яго не праверылі на датычнасць да забойстваў2
Каментары