Пра гэта заявіла Крысціна Галах на сустрэчы з журналістамі з Беларусі, Украіны, Расіі і Малдовы ў Бруселі.
Аб намеры працягваць працу з беларускай апазіцыяй заявіла прэс‑сакратар Хаўера Саланы Крысціна Галах 24 лютага на сустрэчы з журналістамі з Беларусі, Украіны, Расіі і Малдовы ў Бруселі.
Такім чынам прэс‑сакратар вярхоўнага прадстаўніка па пытаннях агульнай знешняй палітыкі і палітыкі бяспекі Еўрасаюза, генеральнага сакратара Савета ЕС пракаментавала выказванне Аляксандра Лукашэнкі на сустрэчы з Х.Саланай у Мінску аб неабходнасці весці дыялог Беларусь — ЕС без пасрэднікаў.
«Абсалютна ясна, што ЕС не толькі паважае, але і шырока вітае дзеянні палітычных лідэраў апазіцыі ў Беларусі, якія вялі вельмі цяжкую палітычную барацьбу», — сказала К.Галах. Паводле яе слоў, сведчаннем стаўлення ЕС да беларускай апазіцыі з’яўляецца тое, што пасля прыезду ў Беларусь генеральны сакратар Савета ЕС спачатку сустрэўся менавіта з апазіцыйнымі лідэрамі.
Як зазначыла К.Галах, прадстаўнікі беларускай апазіцыі падкрэслілі праблему свабоды прэсы ў Беларусі, паведамілі аб фактах парушэння правоў чалавека, у тым ліку аб арышце маладых апазіцыйных актывістаў 14 лютага. Падчас сустрэчы Х.Салана гарантаваў, што заявы апазіцыі будуць разгледжаны ЕС.
«Беларусь зможа браць удзел у праекце Еўрасаюза «Усходняе партнёрства», толькі калі ўмовы ЕС будуць выкананы», —падкрэсліла прадстаўнік Х.Саланы. У прыватнасці, у Беларусі павінны выконвацца правы чалавека, павінен быць наладжаны дыялог паміж апазіцыяй і ўрадам, забяспечана свабода прэсы.
Паводле слоў К.Галах, Х.Салана ацэньвае свой візіт у Беларусь як «добры» і адзначае пэўныя пазітыўныя зрухі ў выкананні краінай умоў ЕС. Канчатковае рашэнне наконт уключэння Беларусі ў ініцыятыву ЕС «Усходняе партнёрства» будзе прынята 19—20 сакавіка на саміце Еўрасаюза ў Бруселі.
Прадстаўнік Х.Саланы зазначыла, што ЕС хоча бачыць Беларусь у праекце «Усходняе партнёрства».
Паводле яе слоў, Беларусь са свайго боку таксама зацікаўлена ва ўключэнні ў праграму.
К.Галах лічыць, што ўдзел Беларусі ў праекце не павінен выклікаць негатыўную рэакцыю Расіі, з якой Беларусь звязваюць цесныя адносіны. «Расія можа толькі выйграць ад паляпшэння адносінаў паміж Беларуссю і ЕС, таму што добрыя адносіны — гэта тое, што дазваляе выйграць усім», — сказала прэс‑сакратар Х.Саланы.
Каментары