Твор Кішчанкі «Габелен стагоддзя» выстаўлены да канца мая на праспекце Машэрава ФОТЫ
Выстава «Габелена стагоддзя» — унікальнага твора беларускага мастака Аляксандра Кішчанкі (1933—1997) адкрылася 16 мая ў будынку цэнтральнага офіса Банка развіцця на праспекце Машэрава ў Мінску.
«Габелен стагоддзя» — гэта гіганцкі твор вышынёй з шасціпавярховы дом (14 м). Яго плошча — 266 кв.м.
У 1999 годзе твор патрапіў у Кнігу рэкордаў Гінеса як самы вялікі габелен ў свеце.
Думка стварыць «Габелен стагоддзя» ўзнікла ў Аляксандра Кішчанкі ў 1991 годзе ў Нью-Ёрку падчас прэзентацыі яго знакамітай працы — габелена «Чарнобыль», які быў падораны Арганізацыі Аб'яднаных Нацый.
Асобы, прадстаўленыя на габелене належаць гісторыі ХХ стагоддзя. Гэта дзяржаўныя дзеячы і прадстаўнікі сусветнай культуры. Кожны палітык прадстаўляе нацыю, краіну, падзею, гістарычны перыяд: дэ Голь, Чэрчыль, Валенса, Буш-старэйшы, Коль, Сталін, Ленін, Гарбачоў, Ельцын, Клінтан. У левым верхнім куце размешчаны аўтапартрэт мастака, а уверсе справа — партрэт Аляксандра Лукашэнкі. Як распавядаў сам аўтар, месца на габелене было першапачаткова пакінута не канкрэтна для Лукашэнкі, а для асобы, якая ўзначаліць краіну ў 1994 годзе.
Габелен вытканы ўручную з воўны, выстаўляўся ўсяго некалькі разоў.
Па словах старшыні праўлення Банка развіцця Беларусі Сяргея Румаса, палатно выдатна ўпісалася ў інтэр'ер будынка.
Асаблівасць экспазіцыі ў тым, што дзякуючы архітэктуры будынка і размяшчэння ў ім габелена наведвальнікам ўпершыню прадастаўлена магчымасць дэталёва разгледзець твор на розных узроўнях.
Выстава «Габелен стагоддзя» будзе доўжыцца ў Банку развіцця па 30 мая. Уваход на яе будзе бясплатным. Працуюць экскурсаводы.
Цяпер чытаюць
Стала вядома, дзе працуе фаварытка Лукашэнкі Уладлена Зайцава6
Каментары