Міліцыянты загадалі ўпусціць іх у кватэру. Хлопец жа наадварот, пазваніўшы ў дамафон, папярэдзіў калег, каб не адмыкалі.
3 лютага міліцыя спрабавала ўварвацца ў кватэрку, якую выкарыстоўвалі ў Мінску замест офіса рэпарцёры тэлеканала «Белсат». Аператар Іван Шульга акурат выходзіў з пад’езду. Міліцыянты загадалі ўпусціць іх у кватэру. Хлопец жа наадварот, пазваніўшы ў дамафон, папярэдзіў калег, каб не адмыкалі.
Шульгу скруцілі, а ў кватэру на вуліцы Дарашэвіча пачалі грукацца. Міхась Янчук, які афіцыйна здымае гэту кватэру ў палітыка Алеся Міхалевіча, папрасіў людзей у цывільным патлумачыць, што адбываецца. Адзін, які назваўся старшым лейтэнантам Савецкага РАУС Каральковым, сказаў, што паступіла скарга ад суседзяў. Урэшце, міліцыя сышла ні з чым. На наступны дзень Івана Шульгу судзілі за «дробнае хуліганства» і далі 10 сутак арышту.
М.Янчук назваў падзеі спробай дыскрэдытаваць канал і зашкодзіць працы незалежных журналістаў.
Іван Шульга дагэтуль адбывае пакаранне на Акрэсціна.
Каментары